३ जेठ, जनकपुर: सत्तारूढ नेपाली कांग्रेसले मधेश प्रदेश सरकार स्वास्थ्य सेवाको संवेदनशीलता लाई उपेक्षा गर्दै अस्पताल सञ्चालन प्रति पूर्वाग्रही भएको आरोप लगाएको छ।
नेपाली कांग्रेस मधेश प्रदेश संसदीय दलका उपनेता तथा पूर्वमन्त्री वीरेन्द्र प्रसाद सिंहले मुख्यमन्त्री सतीश कुमार सिंह र स्वास्थ्य तथा जन-संख्या मन्त्री शत्रुधन प्रसाद सिंह लाई ज्ञापन-पत्र बुझाउँदै तत्काल अस्पताल सञ्चालन गर्न ध्यानाकर्षण गराएका छन्।
२०८० मंसिर १८ गतेको मन्त्रिपरिषद् बैठकले ६ वटा जिल्ला अस्पताललाई १०० शैय्याको बनाउने र थप ५ वटा ५० शैय्याका नयाँ अस्पताल सञ्चालन गर्ने निर्णय गरे पनि त्यसको कार्यान्वयनमा प्रदेश सरकार गम्भीर नभएको कांग्रेसको आरोप छ।
सिंहका अनुसार आवश्यक जनशक्तिका लागि अस्थायी दरबन्दी स्वीकृत भइसकेको र विज्ञापन मार्फत कर्मचारी छनोट प्रक्रिया पनि सम्पन्न भइसकेको अवस्थामा अस्पतालहरू सञ्चालनमा नआउनु सरकारको लापरवाही र नियत प्रति प्रश्न उठाउने विषय हो।
ज्ञापनपत्रमा उनले उल्लेख गरेका छन्, “दरबन्दी अनुसारको जनशक्ति तत्काल सम्बन्धित अस्पतालहरूमा खटाई ती अस्पतालहरू शीघ्र सञ्चालन गरिनु पर्छ।”
कांग्रेसले मन्त्रालयको लापरवाहीले नागरिकहरू स्वास्थ्य सेवा बाट वञ्चित भइरहेको भन्दै यसलाई गम्भीर अन्यायको संज्ञा दिएको छ। खास गरी दूरदराजका जिल्लाहरूमा स्वास्थ्य सेवा पहुँच नपुग्दा जनताको जीवन स्तरमा नकारात्मक प्रभाव परेको भन्दै प्रदेश सरकार लाई तत्काल कदम चाल्न आग्रह गरिएको छ।
आफ्नो प्रतिकृया दिनुहोस्