१७ जेठ,जनकपुर, मधेश प्रदेश:मधेश प्रदेशका मुख्यमन्त्री सतिश कुमार सिंह र ‘रेन’ परियोजनाका वरिष्ठ अनुकूलन अधिकृत सन्तोष कुमार मोरबैता यादव बीच शुक्रबार परियोजना सम्बन्धी विशेष छलफल सम्पन्न भएको छ।
छलफलका क्रममा ‘ रेन: लचिलोपन, अनुकूलन र समावेशीताका लागि नेपालमा समुदाय नेतृत्वमा आधारित समग्र पहल’ परियोजनाको उद्देश्य, कार्यक्षेत्र तथा अपेक्षित प्रभाव बारे विस्तृत जानकारी प्रस्तुत गरियो। संयुक्त अधिराज्य सरकारको सहयोगमा, पिपुल इन निड र डेनचर्च एडसँगको साझेदारीमा ली बर्ड द्वारा सञ्चालित यो परियोजना विक्रम संवत २०८२ देखि २०८७ सम्म लागू हुनेछ। परियोजना मधेश प्रदेशका पाँच जिल्लाका १४ वटा पालिकामा कार्यान्वयन गरिने जनाइएको छ।
वरिष्ठ अनुकूलन अधिकृत यादवले परियोजनाले मधेश र लुम्बिनी प्रदेशमा जलवायु परिवर्तनसँग सम्बन्धित जोखिम न्यूनीकरण, प्रकृतिमा आधारित समाधान, पूर्वतयारी रणनीति, समुदाय-आधारित सुरक्षित आवास तथा समावेशी कार्यक्रमहरू सञ्चालन गर्ने जानकारी दिए।
मुख्यमन्त्री सिंहले जलवायु परिवर्तनका कारण मधेश प्रदेश सबैभन्दा बढी प्रभावित भएको उल्लेख गर्दै यस्तो परियोजनाले स्थानीय तहमा लचिलोपन र प्रतिरोधात्मक क्षमता वृद्धि गर्न मद्दत पुग्ने विश्वास व्यक्त गरे। साथै, उनले परियोजनाको सफल कार्यान्वयनका लागि प्रदेश सरकार बाट आवश्यक सहयोग सुनिश्चित गरिने प्रतिबद्धता जनाए।
छलफल कार्यक्रममा मधेश प्रदेश वन निर्देशनालयका निर्देशक जगरनाथ जसवाल, प्रदेश नीति तथा योजना आयोगका उपाध्यक्ष डा. सोहन प्रसाद साह, समृद्धिका लागि वन परियोजनाका प्रमुख सुजित कुमार झा, मुख्यमन्त्रीका राजनीतिक सल्लाहकार सञ्जय कुमार यादव, सिरहा नगरपालिका र दुर्गा भगवती गाउँपालिकाका प्रतिनिधिहरूको उपस्थिति रहेको थियो। साथै, प्रदेश सरकारका अन्य उच्च अधिकारीहरू र सरोकारवाला निकायका प्रतिनिधिहरूको समेत सहभागिता थियो।
आफ्नो प्रतिकृया दिनुहोस्