१२ साउन,जनकपुर।मधेश प्रदेश सरकारले ‘ घरधुरी बीमा’ र ‘नागरिक बीमा’ कार्यक्रम औपचारिक रूपमा शुरु गरेको छ। यो कार्यक्रम नेपालमै पहिलो पटक कुनै प्रदेशले लागू गरेको ऐतिहासिक पहल हो।
मुख्यमन्त्री सतिश कुमार सिंहको नेतृत्वमा शुरु गरिएको बीमा योजनाको पहिलो चरणमा एक लाख घरधुरी र ६ हजार ६ सय नागरिकलाई बीमाको दायरामा ल्याइएको छ।मुख्यमन्त्री सिंहका अनुसार कार्यक्रम मार्फत कुल करिब ५९ अर्ब १० करोड रुपैयाँ बराबरको बीमा सुरक्षा सुनिश्चित गरिएको छ।
घरधुरी बीमा अन्तर्गत आगलागी, चट्याङ, बाढी, पहिरो, आँधी-हुरी जस्ता प्राकृतिक विपत्तिबाट भएको क्षतिपूर्तिमा प्रति घरधुरी अधिकतम ५ लाख रुपैयाँको बीमा सुविधा प्रदान गरिनेछ।नागरिक बीमा कार्यक्रमले आकस्मिक मृत्यु, शारीरिक अपांगता तथा दुर्घटनामा घाइते भएका अवस्थालाई समेट्ने छ। बीमाको अधिकतम सीमा १० लाख रुपैयाँ तोकिएको छ।
प्रदेशका आठवटै जिल्लाका नागरिकले यो सुविधा लिन सक्ने छन्। भारतमा दुर्घटनामा परेर मृत्यु भए पनि प्रदेशका नागरिकलाई १० लाख रुपैयाँ सम्म बीमा सुविधा दिइने छ।सरकारले बीमा दाबी प्रक्रिया पारदर्शी र सरल बनाएको जनाएको छ।
दाबीका लागि साक्ष्य सहित निवेदन, प्रहरी वा अस्पतालको प्रतिवेदन, स्थानीय तहको सिफारिस तथा प्रदेश नागरिक भएको प्रमाण अनिवार्य हुनेछ।मुख्यमन्त्री सिंहले यस्तो प्रणालीले राहत वितरण प्रक्रिया सहज र प्रभावकारी हुने विश्वास व्यक्त गरेका छन्।
आफ्नो प्रतिकृया दिनुहोस्