वीरगञ्ज । जनता समाजवादी पार्टी नेपाल (जसपा) का केन्द्रीय सदस्य योगेन्द्र राय यादवले गौर हत्याकाण्डलाई पुन: ब्युँताएर सरकारले मधेसी जनतालाई थर्काउन खोजेको आरोप लगाएका छन् ।
साढे १८ वर्षअघि भएको घटनालाई राजनीतिक प्रतिशोध साध्ने नियतले अहिले उचालिएको भन्दै उनले यस्तो कदमले मधेसमा पुन: असन्तोष र आन्दोलन भड्किन सक्ने चेतावनी दिएका हुन् ।
सर्वोच्च अदालतले सोमबार जसपा नेपालका अध्यक्ष उपेन्द्र यादवमाथि गौर घटनामा अनुसन्धान गर्न परमादेश जारी गरेको छ । तर, घटनाको दिन यादव घटनास्थलमै नभएको दाबी गर्दै नेता योगेन्द्र यादवले यसलाई “सरकारको षड्यन्त्र” भनेका छन् ।
उनका अनुसार, भूमि सम्बन्धी अध्यादेश मधेस विरोधी भएकाले अध्यक्ष उपेन्द्र यादवले त्यसमा हस्ताक्षर नगरेको बदला स्वरूप तत्कालीन प्रधानमन्त्री केपी शर्मा ओली नेतृत्वको सरकारले गौर घटनालाई उठाएको हो ।
नेता यादवले भने, “निर्दोषलाई फसाउने प्रयास भयो भने हामी चुप लागेर बस्दैनौँ । सरकारले गलत कदम चाले मधेसमा पुन: निर्णायक आन्दोलन हुनेछ ।” उनले आजै देखि रौतहटको गौरबाट विरोधको सुरुवात गर्ने चेतावनी पनि दिए ।
२०६३ साल चैत ७ गते गौरको राइस मिलमा मधेसी जनअधिकार फोरम र माओवादी कार्यकर्ता बिच भएको भिडन्तमा २७ जनाको मृत्यु भएको थियो । जसपा नेपालका अनुसार घटना तत्कालीन माओवादी नेता प्रभु साहको निर्देशनमा भएको हो ।
“घटनाका मुख्य योजनाकार प्रभु साहलाई कारबाही गर्नु पर्नेमा सरकारले उल्टै उपेन्द्र यादवलाई फसाउन न्यायालयलाई प्रयोग गरेको छ, जुन गम्भीर आपत्तिजनक कुरा हो,” यादवले भने । उनले सरकारलाई रवैया सुधार्न आग्रह गर्दै मधेसमा पुन: विद्रोह भए त्यसको सम्पूर्ण जिम्मेवारी सरकारले लिनु पर्ने चेतावनी दिएका छन् ।
साभार: यात्रा डेली
आफ्नो प्रतिकृया दिनुहोस्