१० असार,जनकपुरधाम । मधेश प्रदेशका मुख्यमन्त्री सतिश कुमार सिंहले सोमबार पर्सा जिल्लाको ड्राइपोर्ट देखि परवानीपुर सम्मको सडक खण्डमा गरेको छड्के अनुगमनका क्रममा अवैध सवारी कर असुलीमा संलग्न तीन जनालाई नियन्त्रणमा लिइएको छ।
भारतबाट प्रवेश गर्ने विशेषगरी भारतीय सवारीसाधनहरू बाट तोकिएको भन्दा बढी रकम असुली भइरहेको गुनासो बढे पछि मुख्यमन्त्री सिंह आफैँ स्थलगत निरीक्षणमा निस्किएका थिए। निरीक्षणका क्रममा नयाँ सडक-खण्डका विभिन्न अस्थायी टोल नाकाहरू (ढाट) मा अवैध असुली भइरहेको प्रमाण फेला परेपछि तीन जना लाई रंगेहात पक्राउ गरिएको पर्सा प्रहरीले जानकारी दिएको छ।
पक्राउ परेकाहरूलाई जिल्ला प्रहरी कार्यालय, पर्सामा बुझाइएको छ। उनीहरूको विस्तृत विवरण भने अझै सार्वजनिक गरिएको छैन। अनुसन्धान पछि थप जानकारी दिने प्रहरीले जनाएको छ।
मुख्यमन्त्री सिंहले अनुगमन पछि सञ्चारकर्मीहरूसँग कुरा गर्दै भने, “जनताको गुनासो सुनिन्थ्यो, आज प्रत्यक्ष देखियो। अवैध असुली, बलजफ्ती कर र सीमापार सवारीसाधन माथिको दुव्र्यवहार अब सह्य हुने छैन।”
प्रदेश सरकारले यस अघि पनि सीमा क्षेत्र, सडक ढाट र अन्य नाकाहरूमा हुने गैरकानुनी असुली तथा कारोवार नियन्त्रण गर्न विशेष पहल सुरु गरिसकेको थियो। सोमबारको अनुगमनलाई प्रदेश सरकारले कारबाहीको संकते रूपमा लिएको छ।
मुख्यमन्त्री सिंहले यस्ता गैरकानुनी कार्यहरूमा प्रदेश सरकारको “शून्य सहनशीलता” नीति कायम रहने स्पष्ट संकेत दिएका छन्।
आफ्नो प्रतिकृया दिनुहोस्